ဒုတိယ ဗိုလ်ချုပ်ကြီး စိန်ဝင်း ဒုတိယ သမ္မတ ဖြစ်လာဖွယ် ရှိ

 ဒုတိယ ဗိုလ်ချုပ်ကြီး စိန်ဝင်း ဒုတိယ သမ္မတ ဖြစ်လာဖွယ် ရှိ

By ထက်နိုင်ဇော် 25 November 2020

အမျိုးသား ဒီမိုကရေစီ အဖွဲ့ ချုပ် (NLD) အစိုးရလက်ထက်တွင် ကာကွယ်ရေးဝန်ကြီးအဖြစ် တာဝန်ထမ်းဆောင်နေသူ ဒုတိယ ဗိုလ်ချုပ်ကြီး စိန်ဝင်းသည် ၂၀၂၁ အလွန် NLD အစိုးရအဖွဲ့ တွင် တပ်မတော်မှ တင်သွင်းသည့် ဒုတိယ သမ္မတ ဖြစ်လာဖွယ် ရှိကြောင်း သိရသည်။

ဒုတိယ ဗိုလ်ချုပ်ကြီး စိန်ဝင်းသည် တပ်မတော်(ကြည်း)ဗိုလ်သင်တန်းကျောင်း အပတ်စဉ် ၅၄ မှ ဖြစ်ပြီး ၂၀၁၅ ခုနှစ်တွင် လေကြောင်းရန် ကာကွယ်ရေး အရာရှိချုပ်အဖြစ်မှ ကာကွယ်ရေး ဝန်ကြီး ဖြစ်လာသူတဦး ဖြစ်သည်။

“စစ်ဘက်ရော အရပ်ဘက်မှာရော အဆင်ပြေမယ့်သူမျိုးကို ရွေးမှာဆိုတော့ ဒုတိယ သမ္မတက သူပဲ ဖြစ်လာလိမ့်မယ်”ဟု တပ်မတော်နှင့် နီးစပ်သူတဦးက သုံးသပ်ပြောကြားသည်။

ဒုတိယ ဗိုလ်ချုပ်ကြီး စိန်ဝင်းသည် ပြင်ဦးလွင်ဇာတိ ဖြစ်ပြီး ရန်ကုန်တက္ကသိုလ်ကို ၁၉၇၂ ခုနှစ်တွင် တက်ရောက်ခဲ့ကြောင်း၊ ၁၉၇၇ ခုနှစ်တွင် သိပ္ပံဘွဲ့ ကို သချာၤဘာသာဖြင့် ရရှိခဲ့ပြီး ၁၉၈၉ တွင် တွက်ချက်ရေး ဒီပလိုမာ၊ ၂၀၀၃ ခုနှစ်တွင် မဟာဝိဇ္ဇာ ဘွဲ့ (ကာကွယ်ရေး)တို့ကို ရရှိခဲ့ကြောင်း သိရသည်။

“သူက သချာၤနဲ့ ဘွဲ့ရတာ။ လူရည်ချွန်၊ နောက်ဆုံး မာစတာလည်း ရတယ်။ တပ်မတော် ကွန်ပြူတာ ဌာနကနေ ခြေလျင် ဘက်ကို ရောက်တယ်။ နောက်ဗိုလ်မှူးကြီး အဖြစ်နဲ့ မေမြို့က သုတေသနတပ်ကို ရောက်တယ်။ အရင်က ဗိုလ်မှူးကြီး အဆင့်တွေ ကိုင်ရတာ။ သူ့လက်ထက်မှာ ဗိုလ်မှူးချုပ်ဖြစ်တယ်။ အဲဒီကနေ ဒီဘက် ပြန်ရောက်လာတာ”ဟု တပ်မတော်နှင့် နီးစပ်သူက ပြောသည်။

ဒုတိယ ဗိုလ်ချုပ်ကြီး စိန်ဝင်းကို ဒုတိယ သမ္မတလောင်းအဖြစ် ရွေးချယ်မှုသာ တကယ်ဖြစ်ခဲ့ပါက ၂၀၂၁ အလွန် အစိုးရ အ ဖွဲ့ နှင့် ပတ်သက်၍ တပ်မတော်ကသတိထား၍ ရွေးချယ်ပေးလိုက်ခြင်းဟု သုံးသပ်ရမည် ဖြစ်ကြောင်း နိုင်ငံရေး လေ့လာ သုံးသပ်သူ ဒေါက်တာ ရန်မျိုးသိမ်းက ပြောသည်။

“ဒုတိယ ဗိုလ်ချုပ်ကြီး စိန်ဝင်းဟာ တပ်မတော်ထဲမှာရော အများပြည်သူကြားမှာရော နာမည်ကောင်းရှိတဲ့ ပုဂ္ဂိုလ်တယောက် ဖြစ်တယ်။ သူ့ရဲ့ ဖြတ်သန်းမှုကလည်း တက္ကသိုလ်ကျောင်းသားဘဝ၊ အရပ်သား ဘဝ ဖြတ်သန်းမှုတွေက တပိုင်း၊ တပ်မ တော် အရာရှိအဖြစ် ဖြတ်သန်းမှုတပိုင်း တွေ့ ရတာကိုလည်း အလေးထားပြီးတော့ ထည့်တွက်တဲ့ ပုံစံမျိုး ရှိတယ်”ဟု ပြောသည်။

၎င်းက ဆက်၍ “အထူးသဖြင့် လွန်ခဲ့တဲ့ အစိုးရသက်တမ်း ၅ နှစ် အတွင်းမှာ အစိုးရ အဖွဲ့ အတွင်းမှာ ဝန်ကြီး အဖြစ်နဲ့ တာ ဝန်ထမ်းဆောင်ခဲ့တဲ့ ပုဂ္ဂိုလ် ဖြစ်တဲ့အတွက် အစိုးရ အဖွဲ့ နဲ့လည်း မစိမ်းတဲ့ ပုဂ္ဂိုလ်မျိုးပေါ့လေ။ နိုင်ငံတော် အတိုင်ပင်ခံ ပုဂ္ဂိုလ် ဒေါ်အောင်ဆန်းစုကြည်နဲ့လည်းပဲ ဆက်ဆံရေးကောင်းမယ့် ပုဂ္ဂိုလ်မျိုးကို ဦးစားပေး ရွေးခဲ့တယ်လို့ မြင်ပါတယ်”ဟု ပြောသည်။

ဒုတိယ ဗိုလ်ချုပ်ကြီး စိန်ဝင်း တက်ရောက်ခဲ့သည့် တပ်မတော်(ကြည်း)ဗိုလ်သင်တန်းကျောင်း အပတ်စဉ် ၅၄ သည် စစ်တက္ကသိုလ် အပတ် စဉ် ၁၇၊ ၁၈ တို့နှင့် ခေတ်ပြိုင် ဖြစ်သဖြင့် သူမတိုင်မီ ၂၀၁၅ ခုနှစ်အထိ ကာကွယ်ရေးဝန်ကြီး အဖြစ် တာဝန်ယူခဲ့သူ ဒုတိယ ဗိုလ်ချုပ်ကြီး ဝေလွင်သည်လည်း စစ်တက္ကသိုလ် အပတ်စဉ် ၁၈ မှ ဖြစ်သည်။

ဒုတိယ ဗိုလ်ချုပ်ကြီး စိန်ဝင်းသည် ပြီးခဲ့သည့် ရက်ပိုင်းက တပ်မတော်ပိုင် မြဝတီ သတင်းစာနှင့် အစိုးရပိုင် သတင်းစာတို့တွင် “ရန်ကုန် တက္ကသိုလ် ကျောင်းတော်သား ကျနော်”အမည်ဖြင့် ဆောင်းပါးတပုဒ် ရေးသားခဲ့သေးသည်။

သူ၏ ဆောင်းပါးတွင် ၁၉၇၂ ခုနှစ်က တက္ကသိုလ်ဝင် စာမေးပွဲကို အောင်မြင်ပြီး ဆေးတက္ကသိုလ် အမှတ်မီသော်လည်း မိဘ များက ငွေကြေး မတတ်နိုင်ကြောင်း၊ ထောက်ပံ့မည့်သူ ရှိသည့်အခါ ရန်ကုန်တက္ကသိုလ်ကို တက်ရောက်လို၍ အခြေခံ

သိပ္ပံ ပညာသင်ဆု လျှောက်ထားခဲ့ကြောင်း ရေးသားထားသည်။

မကြာမီ ကျင်းပတော့မည့် ရန်ကုန်တက္ကသိုလ်ရာပြည့်ပွဲအတွက် အထိမ်းအမှတ်အဖြစ် ၎င်းစိန်ရတု ကျောင်းသားဘဝအကြောင်းကို ဒုတိယ ဗိုလ်ချုပ်ကြီး စိန်ဝင်းက ရေးသားထားခြင်း ဖြစ်ပြီး စာရေးကောင်းသူတဦးဟု ခေါ်ဆိုနိုင်သည်။

ပြီးခဲ့သည့် ၂၀၂၀ ခုနှစ်၊ မေလက NLD ပါတီ ကြီးစိုးထားသည့် လွှတ်တော်က ကာကွယ်ရေး အသုံးစရိတ် များသဖြင့် တပ် မတော်ဘတ်ဂျက်ထဲမှ ကျပ် ဘီလီယံ ၁ သောင်းခန့် ဖြတ်တောက်သည့်အခါကလည်း ဒုတိယ ဗိုလ်ချုပ်ကြီး စိန်ဝင်းသည် ပြည်ထောင်စု လွှတ်တော်သို့ ကိုယ်တိုင်လာရောက် ရှင်းလင်းခဲ့သေးသည်။

လွှတ်တော်၏ ဘတ်ဂျက် ဖြတ်တောက်ခံရခြင်းကို မဲမခွဲဘဲ လက်ခံခဲ့သော်လည်း နိုင်ငံတော်အတွက် စစ်ဆင်ရေးနဲ့ လုံခြုံ ရေး တာဝန်များကို အသက်စွန့် ထမ်းဆောင်နေကြရသော စစ်မှုထမ်းများ၊ ရသင့် ရထိုက်သည့် ခံစားခွင့်များ မဆုံးရှုံးစေရန် အတွက် ပြည်ထောင်စု လွှတ်တော်က ဘတ်ဂျက်ကို မဖြတ်သင့်ကြောင်း တင်ပြခဲ့သေးသည်။

ဒုတိယ ဗိုလ်ချုပ်ကြီး စိန်ဝင်းသည် အနေအထိုင် အေးဆေးတည်ငြိမ်သူတဦး ဖြစ်သဖြင့် ၎င်း ဒုတိယ သမ္မတ ဖြစ်လာပါက စစ်ဘက်-အရပ်ဘက် ဆက်ဆံရေး ပိုကောင်းလာနိုင်ကြောင်း NLD ပါတီမှ မင်္ဂလာဒုံမြို့နယ် ပြည်သူ့လွှတ်တော် ကိုယ်စား လှယ် ဦးအောင်လှိုင်ဝင်းက ပြောသည်။

“အရပ်ဘက်-စစ်ဘက် ဆက်ဆံရေး အတွက် ရှု့ထောင့်တခုတည်းက ကြည့်ရင် တော်တော်လေး အဆင်ပြေမယ်လို့ ထင် တယ်။ သူက တခြား ဗိုလ်ချုပ်တွေလို လည်း မဟုတ်ဘူး။ ပုံစံတမျိုးပေါ့။ လွှတ်တော်မှာ မေးခွန်းတွေဘာတွေ မေးရင်လည်း သေချာ ရှင်းပြတယ်”ဟု ဦးအောင်လှိုင်ဝင်းက ပြောသည်။

၂၀၀၈ ဖွဲ့ စည်းပုံ အခြေခံ ဥပဒေအရ ဒုတိယသမ္မတလောင်း ၁ ဦးကို တပ်မတော် ကာကွယ်ရေး ဦးစီးချုပ်က အမည်စာရင်း တင်သွင်းခွင့်ရှိသည်။

ထို့ကြောင့် ၂၀၁၀ ရွေးကောက်ပွဲအပြီးတွင် တပ်မတော်က ဒုတိယ သမ္မတလောင်းအဖြစ် ဒုတိယ ဗိုလ်ချုပ်ကြီး သီဟသူရ တင်အောင်မြင့်ဦး၊ ၂၀၁၅ ရွေးကောက်ပွဲ အပြီးတွင် ရန်ကုန်တိုင်း ဝန်ကြီးချုပ် ဦးမြင့်ဆွေတို့ကို အမည်စာရင်းများ တင်သွင်း ခဲ့ဖူးသည်။

လက်ရှိ ဒုတိယ သမ္မတလည်း ဖြစ်သူ ဒုတိယ ဗိုလ်ချုပ်ကြီးဟောင်း ဦးမြင့်ဆွေသည် စစ်တက္ကသိုလ် အပတ်စဉ် ၁၅ မှ ဖြစ် ပြီး ရန်ကုန်တိုင်း စစ်ဌာနချုပ် တိုင်းမှူးလည်း လုပ်ဖူးသဖြင့် ၂၀၁၁ ခုနှစ်တွင် ဦးသိန်းစိန်၏ အရပ်သားတပိုင်း အစိုးရ တက် လာသည့်အခါ ရန်ကုန်တိုင်း ဝန်ကြီးချုပ် အဖြစ် တာဝန်ပေးခံရသည်။

၂၀၁၂ ခုနှစ်တွင် ဒုတိယ သမ္မတ ဖြစ်နေသူ ဦးတင်အောင်မြင့်ဦး အနားယူသည့်အခါ ဦးမြင့်ဆွေကို ဒုတိယ သမ္မတအဖြစ် တင်ရန် ကြိုးပမ်းခဲ့သော်လည်း ဖွဲ့ စည်းပုံ အခြေခံ ဥပဒေ ပုဒ်မ ၅၉ (စ)အရ ထိုစဉ်က ဦးမြင့်ဆွေ၏ သားဖြစ်သူမှာ သြစတေးလျနိုင်ငံသား ဖြစ်နေသဖြင့် မအောင်မြင်ခဲ့ပေ။

သို့သော် နောက်ပိုင်းတွင် ဦးမြင့်ဆွေ၏ သားဖြစ်သူမှာ နိုင်ငံသား ပြန်လည် လျှောက်ထားခဲ့ပြီးနောက် ၂၀၁၆ ခုနှစ် NLD အစိုးရ လက်ထက်သို့ ရောက်သည့်အခါ တပ်မတော်မှ တင်ပြသည့် ဒုတိယ သမ္မတမှာ ဦးမြင့်ဆွေ ဖြစ်လာသည်။

ဦးမြင့်ဆွေသည် ရန်ကုန်တိုင်း ဝန်ကြီးချုပ်၊ ဒုတိယ သမ္မတ စသည့် ကြီးမားသည့် ရာထူးများ ရရှိခြင်းမှာ တပ်မတော် ခေါင်း ဆောင်ဟောင်း ဗိုလ်ချုပ်မှူးကြီး သန်းရွှေက အလွန်သဘောကျ၍ ဖြစ်ပြီး ၎င်း၏ လူယုံသဖွယ် ဖြစ်နေသဖြင့် ယခုလို တာ ဝန်ပေးအပ်ခံရခြင်းဟု သိရသည်။

၂၀၀၈ ဖွဲ့စည်းပုံ အခြေခံ ဥပဒေ ပေါ်ပေါက်လာပြီးနောက် မြန်မာနိုင်ငံ၏ ဒုတိယ သမ္မတများမှာ ဦးဉာဏ်ထွန်း၊ ဦးတင်အောင်မြင့်ဦး၊ ဒေါက်တာ စိုင်းမောက်ခမ်း၊ ဦးမြင့်ဆွေနှင့် ဦးဟင်နရီ ဗန်ထီးယူတို့ ဖြစ်ကြသည်။

Credit: ဧရာဝတီ